حكاية العيون الحلوين

- احكيلك حكاية؟
- احكي.
- شايف البحر شو كبير....
- قديمة .. حكتها فيروز قبلك .
- لا ما حكتها. فيروز من وين بتعرفك لتحكيلك "كبر البحر بتحبك". أنا بعرفك منشان هيك بحكي كبر البحر بحبك إلك أنت؛ محمد اللي ما بتعرفه فيروز وبعرفه أنا.. الأغاني ما بتاخد معناها من مين غناها .. لأ .. منا احنا لما بنغنيها. بعدين فيروز ما بتعرف تحب أصلا .. حدا بيقول "بدي أندر شمعة وتخليني حبك" ، هلأ الحب بيستنى شي إذن ولا بيطش طش..
- بيطش طش !!
- إيه ... بطش .. بتحبني ؟؟
- إنت شايفة إيه؟
- بتحبني .. بعرف .. مبين من عيونك .. لأنو لو ما بتحبني ما بقيو حلوين هيك.. قلتلك قَبِل إنو عيونك حلوين ؟!